SAIN FFAGAN AMGUEDDFA WERIN CYMRU

Sain Ffagan Amgueddfa Werin Cymru yw atyniad treftadaeth mwyaf poblogaidd Cymru ers blynyddoedd lawer ac mae’n dal lle arbennig yng nghalonnau’r bobl yma.

Mae hyn oherwydd bod Sain Ffagan yn amgueddfa’r bobl, lle rydyn ni’n archwilio hanes gyda’n gilydd trwy fywydau beunyddiol pobl.

Mae mynediad i’r Amgueddfa am ddim, diolch i gefnogaeth gan Lywodraeth Cymru.

Saif yn nhiroedd castell hynod Sain Ffagan, plasty o’r 16eg ganrif a roddwyd i bobl Cymru gan Iarll Plymouth. Dros yr hanner canrif diwethaf, ail-adeiladwyd dros hanner can adeilad gwreiddiol o wahanol leoliadau yng Nghymru ac o gyfnodau hanesyddol gwahanol yn y tir parc 100 erw hwn. Mae pob adeilad wedi ei ddal mewn amser ac mae’n agor y drws i hanes Cymru gan gynnig cipolwg i’r gorffennol.

Cewch weld sut bu pobl Cymru yn byw, gweithio a hamddena. Mae’r adeiladau sydd wedi eu hail-godi yn cynnwys ffermdai, rhes o fythynnod gweithwyr haearn, eglwys ganoloesol, ysgol Fictoraidd, capel a Sefydliad y Gweithwyr hyfryd.

Mae gerddi Sain Ffagan ymhlith goreuon Cymru. Byddwch yn cerdded trwy erddi ffurfiol gosgeiddig castell Sain Ffagan neu weld gerddi’r bwthyn a fyddai’n dod â bwyd i deuluoedd gweithio. Gellir gweld bridiau cynhenid o dda byw yn y caeau a’r ffermdai ac mae arddangosiadau o dasgau ffermio bob dydd.

Mae gweithdai hefyd lle bydd crefftwyr yn dal i arddangos eu sgiliau traddodiadol. Fel arfer bydd eu cynnyrch ar werth. Dewch i weld un o’r gwneuthurwyr clocsiau olaf gweithredol yng Nghymru, neu’r gof. Mae gwehydd sy’n gweithio mewn melin o’r 18fed ganrif a melinydd yn cynhyrchu blawd yn ei felin ŷd o’r 19eg ganrif.

Caiff ymwelwyr olwg ar dreftadaeth a diwylliant cyfoethog Cymru ac mae’r Gymraeg i’w chlywed bob dydd ymhlith crefftwyr a dehonglwyr.