Beth wyt ti'n edrych am?

Gwaith i Ddechrau ar Gam Cyntaf Cledrau Croesi Caerdydd o 15 Mehefin

Dydd Mercher, 10 Mehefin 2026

Bydd y gwaith galluogi i drawsnewid Sgwâr Callaghan fel rhan o gam cyntaf Cledrau Croesi Caerdydd yn dechrau ar 15 Mehefin, gyda llwybr tram-drên newydd i gael ei adeiladu rhwng Gorsaf Drenau Caerdydd Canolog a Bae Caerdydd.

Mae’r prosiect ar y cyd rhwng Cyngor Caerdydd a Thrafnidiaeth Cymru wedi penodi GRAHAM fel y prif gontractwr i gyflawni cam cyntaf y cynllun.

Mae’r cynllun yn nodi dechrau gweledigaeth uchelgeisiol ar gyfer Cledrau Croesi Caerdydd, a fydd, pan fydd wedi’i chwblhau, yn cynnig system dramiau fodern sy’n cysylltu Plasdŵr yng ngogledd-orllewin y ddinas â gorsaf reilffordd newydd arfaethedig Parc Caerdydd yn y dwyrain.

Gyda chefnogaeth £100 miliwn o gyllid ar y cyd gan Lywodraeth Cymru a Chronfa Ffyniant Bro Llywodraeth y DU, bydd cam cyntaf y prosiect yn helpu i reoli’r cynnydd yn nifer yr ymwelwyr, cludo ymwelwyr i ac o’r arena dan do 16,500-sedd sy’n cael ei hadeiladu ar hyn o bryd, a chario gweithwyr, trigolion ac ymwelwyr rhwng y Bae a chanol y ddinas.

Bydd cam 1a y cynllun yn darparu:

Cysylltiad tram-drên newydd rhwng Gorsaf Caerdydd Canolog a Bae Caerdydd, drwy orsaf drenau newydd Sgwâr Loudoun, sydd wrthi’n cael ei hadeiladu
Platfformau tramiau newydd yng Ngorsaf Drenau Caerdydd Canolog a phlatfform ychwanegol yng Ngorsaf Drenau Bae Caerdydd
Tramffordd llwybr deuol newydd trwy Sgwâr Callaghan
Cynllun ffordd symlach, sy’n gwneud yr ardal yn fwy diogel ac yn haws i’w defnyddio
Mannau newydd i gerddwyr, tirlunio a draenio cynaliadwy
Llwybrau beicio hollol ar wahân a gwell croesfannau i gerddwyr

Dywedodd y Cynghorydd Dan De’Ath, yr Aelod Cabinet dros Newid Hinsawdd, Cynllunio Strategol a Thrafnidiaeth: “Mae hwn yn fuddsoddiad hirdymor yn seilwaith trafnidiaeth gyhoeddus Caerdydd, a bydd yn chwarae rhan allweddol wrth gefnogi datblygiadau mawr ledled y ddinas, gan gynnwys ailddatblygu Gorsaf Drenau Caerdydd Canolog, adfywio Sgwâr Callaghan, yr arena dan do newydd ac ailddatblygiad Glanfa’r Iwerydd ym Mae Caerdydd.

“Mae’r weledigaeth ar gyfer Cledrau Croesi Caerdydd wedi’i nodi’n glir yng ngweledigaeth trafnidiaeth 10 mlynedd y ddinas. Mae hyn yn ymwneud ag adeiladu system drafnidiaeth wyrddach, fwy cynaliadwy a fforddiadwy ar gyfer y ddinas.”

Fel gydag unrhyw ddatblygiad o’r raddfa hon, bydd effeithiau ar y rhwydwaith priffyrdd tra bydd gwaith yn digwydd. Er na fydd ffyrdd ar gau yn ystod cam cyntaf y gwaith galluogi, bydd rhai lonydd traffig yn cael eu cau ar Sgwâr Callaghan tra bod y safle’n cael ei glirio a’r contractwr yn dechrau arallgyfeirio cyfleustodau o dan y lôn gerbydau.

Mae arwyddion negeseuon amrywiol (VMS) eisoes yn rhybuddio gyrwyr ar brif lwybrau i mewn i’r ddinas, a bydd arwyddion ychwanegol ar y stryd yn cael eu gosod ar ffyrdd sy’n arwain at Sgwâr Callaghan yn ddiweddarach yr wythnos hon.

Cynghorir gyrwyr i ystyried llwybrau amgen tra bod y gwaith hwn ar y gweill:

O’r gogledd, cynghorir gyrwyr i ddefnyddio Heol y Gogledd, Boulevard de Nantes a Phlas Fitzalan
O’r dwyrain, cynghorir gyrwyr i ddefnyddio Heol Casnewydd a Heol Glossop
O’r de ac o’r gorllewin, cynghorir gyrwyr i ddefnyddio’r A4232 (Ffordd Gyswllt) a’r Ffordd Gyswllt Ganolog

Parhaodd y Cynghorydd De’Ath: “Hoffem ddiolch i’r cyhoedd am eu hamynedd wrth i ni gyflawni’r gwaith hanfodol hwn. Gan y bydd cam cyntaf Cledrau Croesi Caerdydd yn rhedeg trwy Sgwâr Callaghan, mae’r gwaith dan sylw yn gymhleth iawn, gan fod yn rhaid gwneud gwaith sylweddol i ddargyfeirio cyfleustodau allweddol o dan y lôn gerbydau sy’n gwasanaethu busnesau a thrigolion yng nghanol y ddinas a thu hwnt.”

Dywedodd Dan Tipper, Prif Swyddog Seilwaith yn Trafnidiaeth Cymru: “Mae dechrau gwaith ar y cam cyntaf hwn yn garreg filltir bwysig yn y gwaith o adeiladu trafnidiaeth gyhoeddus well i Gaerdydd.

“Gan weithio mewn partneriaeth â Chyngor Caerdydd, rydyn ni’n canolbwyntio ar greu ffyrdd modern, dibynadwy a mwy cynaliadwy i bobl deithio ar draws y ddinas.

“Mae’r Cledrau Croesi yn rhan allweddol o’n gweledigaeth ar gyfer Metro De Cymru a fydd yn cefnogi twf parhaus Caerdydd, yn gwella cysylltedd ac yn rhoi mwy o ddewis i drigolion, busnesau ac ymwelwyr.

“Hoffem ddiolch i’r cyhoedd am eu hamynedd wrth i ni ddechrau’r gwaith hanfodol hwn.”

Dywedodd y Dirprwy Weinidog dros Drafnidiaeth, Mark Hooper: “Rwy’n falch iawn bod gwaith ar fin dechrau y mis hwn ar Gledrau Croesi Caerdydd. Rwyf wedi ymrwymo i ddarparu trafnidiaeth gyhoeddus fforddiadwy o ansawdd uchel ac o ganlyniad i fuddsoddiad o £50 miliwn gan Lywodraeth Cymru, bydd Cledrau Croesi Caerdydd yn gwella cysylltedd yn ein prifddinas.”

Dywedodd Dan Tipper, Prif Swyddog Seilwaith yn Trafnidiaeth Cymru: “Mae dechrau gwaith ar y cam cyntaf hwn yn garreg filltir bwysig yn y gwaith o adeiladu trafnidiaeth gyhoeddus well i Gaerdydd.

“Gan weithio mewn partneriaeth â Chyngor Caerdydd, rydyn ni’n canolbwyntio ar greu ffyrdd modern, dibynadwy a mwy cynaliadwy i bobl deithio ar draws y ddinas.

“Hoffem ddiolch i’r cyhoedd am eu hamynedd wrth i ni ddechrau’r gwaith hanfodol hwn.”

Dywedodd Andrew Henry, Cyfarwyddwr Contractau yn GRAHAM: “Mae dechrau gwaith ar y safle yn foment dyngedfennol i brosiect Cledrau Croesi Caerdydd, a fydd yn newid yn sylfaenol sut mae pobl yn symud o amgylch y ddinas.

“Mae Sgwâr Callaghan yn amgylchedd gwaith prysur ac mae angen gwyriadau cyfleustodau sylweddol o dan y lôn gerbydau cyn y gall gwaith trac ddechrau. Mae ein tîm wedi cynllunio hyn yn ofalus i achosi cyn lleied â phosibl o darfu, a gofynnwn i ddefnyddwyr y ffordd ddilyn yr arwyddion sydd ar waith a chaniatáu ychydig o amser ychwanegol ar gyfer eu teithiau.

“Mae gan Gaerdydd flynyddoedd cyffrous o’n blaenau ac rydym yn falch o fod yn darparu seilwaith ar y raddfa hon yn y ddinas. Mae ein tîm yn edrych ymlaen at drosglwyddo cysylltiad tram-drên a fydd yn gwasanaethu trigolion ac ymwelwyr am genedlaethau i ddod.”