Amgueddfa Parc Treftadaeth Cwm Rhondda yn llwyddo unwaith eto!

Dydd Llun, 13 Gorffennaf 2026

 

Mae Amgueddfa Parc Treftadaeth Cwm Rhondda yn falch o gyhoeddi ei bod wedi cael cydnabyddiaeth gyda Gwobr Dewis y Teithiwr Tripadvisor 2026, gan ei gosod ymhlith yr atyniadau ymwelwyr sydd â’r sgôr uchaf ledled y byd yn seiliedig ar adolygiadau a sgôr ragorol gan ymwelwyr.

Mae’r wobr yn dathlu busnesau sy’n darparu profiadau rhagorol, gydag Amgueddfa Parc Treftadaeth Cwm Rhondda yn ennill canmoliaeth uchel am ei dehongliad diddorol o dreftadaeth lofaol Cymru, taith danddaearol unigryw, gweithgareddau sy’n addas i deuluoedd, a chroeso cynnes i bob ymwelydd.

Wedi’i lleoli yng nghanol Cymoedd De Cymru, mae’r amgueddfa yn rhoi cipolwg unigryw ar hanes diwydiant y pyllau glo a ffurfiodd y rhanbarth. Gall ymwelwyr fwynhau ystod eang o brofiadau, gan gynnwys Taith Dywys Danddaearol Profiad Aur Du, sy’n mynd â gwesteion yn ddwfn i stori bywyd fel glöwr, dan arweiniad cyn-lowyr gwybodus sy’n dod â’r gorffennol yn fyw.

Yn ogystal â’i theithiau ymgolli, mae Amgueddfa Parc Treftadaeth Cwm Rhondda yn cynnwys:

  • Arddangosfeydd rhyngweithiol sy’n archwilio hanes cymdeithasol a diwydiannol Cymoedd y Rhondda
  • Siop roddion Cymreig sy’n arddangos crefftau a chynnyrch lleol
  • Caffi ar y safle sy’n cynnig dewis o luniaeth a phrydau bwyd wedi’u hysbrydoli’n lleol
  • Profiadau grŵp gan gynnwys Arian, Glo ac Iechyd Da – taith grŵp ragorol lle mae ymwelwyr yn mynd ar deithiau yn Amgueddfa Parc Treftadaeth Cwm Rhondda, Profiad y Bathdy Brenhinol a Distyllfa Castell Hensol.
  • Cynnig addysg gwych lle gall ysgolion brofi ystod enfawr o weithgareddau sy’n gysylltiedig â’r cwricwlwm.
  • Calendr blynyddol o ddigwyddiadau gan gynnwys Hwyl gydag Wyau Pasg, Sioe Ceir Clasurol, Calan Gaeaf Arswydus a’r hynod boblogaidd Glofa Deganau Siôn Corn!

Mae’r atyniad yn parhau i esblygu, gan gynnal digwyddiadau yn rheolaidd, sesiynau ymchwil hanes lleol, a dathliadau diwylliannol sy’n apelio at ymwelwyr o bob oedran.

Meddai’r Cynghorydd Scott Emanuel, Aelod o Gabinet Rhondda Cynon Taf ar gyfer Cymunedau, Diwylliant a Hamdden:

Mae Amgueddfa Parc Treftadaeth Cwm Rhondda yn haeddu derbyn Gwobr Dewis y Teithiwr Tripadvisor 2026.  Mae’r gydnabyddiaeth hon yn arbennig o ystyrlon gan ei bod yn adlewyrchu adborth a chefnogaeth ymwelwyr â’r Amgueddfa a Rhondda Cynon Taf. Mae’r tîm yn Amgueddfa Parc Treftadaeth Cwm Rhondda yn angerddol am warchod a rhannu treftadaeth gyfoethog Cymoedd y Rhondda, ac mae’n ymdrechu’n gyson i greu profiad diddorol a chofiadwy i bawb sy’n ymweld. Edrychwn ymlaen at groesawu gwesteion newydd a rhai sy’n dychwelyd trwy gydol y flwyddyn.

Mae Gwobrau Dewis y Teithiwr yn anrhydeddu cyrchfannau ac atyniadau sy’n dangos ymrwymiad i ragoriaeth yn gyson, gan roi Amgueddfa Parc Treftadaeth Cwm Rhondda ar y map fel un o’r safleoedd treftadaeth y mae’n rhaid ymweld ag ef yng Nghymru.

Am fwy o wybodaeth, oriau agor, ac i gynllunio eich ymweliad, ewch i www.rhonddaheritagepark.com