Mae llwybr golau Nadolig gorau Cymru yn ôl - ac mae'n hirach, yn fwy disglair ac yn fwy Nadoligaidd nag erioed o'r blaen!

27 June 2023 · Christmas at Bute Park

Mae llwybr golau Nadolig gorau Cymru yn ôl – ac mae’n hirach, yn fwy disglair ac yn fwy Nadoligaidd nag erioed o’r blaen!
Mae’r Nadolig ym Mharc Bute 2023 yn dod â chynllun newydd, gosodiadau newydd sbon a hanner milltir ychwanegol o hud a lledrith i brifddinas Cymru yn 2023.

Mae llwybr golau Nadolig gorau Cymru, Y Nadolig ym Mharc Bute, yn ôl ac yn fwy nag erioed o’r blaen – gyda chynllun newydd sbon a llwybr hirach o oleuadau yn 2023.

Mae’r digwyddiad sydd wedi ennill gwobrau – y llwybr golau mwyaf poblogaidd yn y DU y tu allan i Lundain ar hyn o bryd – yn ymestyn y llwybr ac yn adolygu ei gynllun a’r amrywiaeth o osodiadau sydd ar gael, gan greu profiad unigryw i bawb sy’n ymweld eleni.
Cyn ei drydydd ymddangosiad, mae’r Nadolig ym Mharc Bute hefyd yn cyflwyno Pentref Nadolig newydd i’r digwyddiad yn 2023, y gellir mynd ato o ddechrau’r llwybr, a bydd tocynnau Safonol ac Oriau Tawel ar gael – sy’n mynd ar werth ddydd Iau (29 Mehefin) – am y tro cyntaf eleni hefyd.

Dywedodd Roxy Robinson, Cyfarwyddwr Creadigol From the Fields, y tîm y tu ôl i’r Nadolig ym Mharc Bute: “Rydym yn falch iawn o fod yn dod â’r Nadolig ym Mharc Bute yn ôl i Gaerdydd am drydedd flwyddyn, ac rydym mor gyffrous i ddatgelu’r holl bethau ychwanegol gwych rydym yn eu rhoi ar waith ar gyfer 2023.”

“Rydym wedi gwrando ar yr adborth ac wedi ymestyn y llwybr, fel y gall pawb ei fwynhau am gyfnod hirach. Mae hefyd yn mynd i fod yn hollol wahanol yn y ffordd y mae wedi’i osod a’r amrywiaeth o ardaloedd ac effeithiau arbennig sydd ar gael. Rydym yn gweithio gyda dylunwyr goleuadau blaenllaw, yn ogystal â phobl greadigol leol, i ddod â golwg a theimlad newydd i’r digwyddiad eleni.”

“Rydym wedi cael ein syfrdanu’n llwyr ag ymateb pobl Cymru i’r Nadolig ym Mharc Bute ers i ni lansio’r digwyddiad am y tro cyntaf ddwy flynedd yn ôl, ac rydyn ni wrth ein bodd i fod yn dod yn ôl eto am drydedd flwyddyn lwyddiannus,” ychwanegodd Roxy.

“I ddiolch am eich cefnogaeth, rydym yn gweithio’n galed i greu profiad Nadoligaidd ffres, cofiadwy a hyd yn oed mwy hudolus nag o’r blaen, ac allwn ni ddim aros i ddangos i bawb sy’n ymweld â’r Nadolig ym Mharc Bute beth sydd ar y gweill ar gyfer 2023.”

Gyda mwy na 145,000 o docynnau wedi’u gwerthu yn 2022, bydd Y Nadolig ym Mharc Bute yn dychwelyd i ganol dinas Caerdydd o 24 Tachwedd hyd at 1 Ionawr 2024, gan ddod â chwe wythnos o hwyl yr ŵyl gydag ef.

Caiff ymwelwyr fwynhau cynllun newydd a hygyrchedd gwell trwy fynedfa a rennir gyda Gŵyl y Gaeaf Cyngor Caerdydd wrth Fynedfa Porth y Gogledd y Castell i Barc Bute, lle mae Heol y Gogledd yn cwrdd â Boulevard de Nantes.

Bydd y Pentref Nadolig yn cynnig bwyd a diod gan fasnachwyr stryd lleol blaenllaw ar ddechrau a diwedd y llwybr eleni.

Bydd y rhai sy’n prynu tocynnau hefyd yn cael yr opsiwn i ymweld yn ystod nifer o slotiau amser gwahanol, gyda chynigion gostyngol a dyddiadau Oriau Tawel a fydd gobeithio yn addas i gyllideb pawb. Fel bob amser, bydd y digwyddiad yn gwbl hygyrch i’r rhai sydd â chadeiriau olwyn a phramiau, gyda’r nod o gynnig dathliad cynhwysol o’r Nadolig i’r teulu cyfan.

Gan barhau â’i waith o’r llynedd, bydd Y Nadolig ym Mharc Bute hefyd yn gweithio gydag elusennau lleol i gynnig tocynnau am ddim i fanciau bwyd, hosbisau, ysgolion a sefydliadau anabledd lleol drwy gydol y digwyddiad unwaith eto eleni.

Dywedodd Aelod Cabinet dros Ddiwylliant, Parciau a Digwyddiadau Cyngor Caerdydd, y Cynghorydd Jennifer Burke: “Mae ysbryd y Nadolig yn rhan greiddiol o’r Nadolig ym Mharc Bute, yr holl ffordd o’r goleuadau hudol i’r £88,000 syfrdanol a godwyd ar gyfer achosion da lleol a’r 1,400 o docynnau a roddwyd am ddim y llynedd i gymunedau na fyddent fel arall wedi gallu mynychu. Rydym yn falch iawn o’u croesawu yn ôl yn 2023 i ledaenu hyd yn oed mwy o hwyl yr ŵyl.”

Mae tocynnau ar gyfer Y Nadolig ym Mharc Bute ar werth i’r cyhoedd cyffredinol heddiw (Dydd Iau 29 Mehefin, 9am) ac ar gael i’w harchebu ar-lein yn www.christmasatbutepark.com.