Mae'n bryd rhoi cynnig ar Gaerdydd y gwanwyn hwn

Dydd Gwener, 14 Mawrth 2025

Beth arall gallaf i ei wneud yn y ddinas?

Gydag amrywiaeth o atyniadau o fewn pellter cerdded, neu ddim ond taith fer i ffwrdd, bydd gan ymwelwyr ormod o ddewis! Edrychwch ar y rhestr isod…

EICONAU:

1) Castell Caerdydd

Wedi’i leoli’n unigryw ar draws y ffordd o Stadiwm Principality, mae’r Castell 2000 oed yn atyniad y mae’n rhaid ei weld. Dewch i archwilio rhai o ardaloedd mewnol Fictoraidd gorau’r DU yn y Tŷ, dringo’r Gorthwr Normanaidd i gael golygfa wych o’r ddinas, a cherdded drwy’r llochesau rhyfel arswydus. Gellir mynd i mewn i’r Ganolfan Ymwelwyr (Bar Caffi a Siop Roddion) am ddim, ond mae angen i ymwelwyr brynu tocyn Mynediad Cyffredinol i archwilio’r Castell a’r tiroedd.

Eisiau dysgu mwy gyda thywysydd arbenigol? Dim ond ar y diwrnod yn y swyddfa docynnau y gellir prynu teithiau o’r Tŷ. Gellir prynu tocynnau mynediad cyffredinol ymlaen llaw ar-lein, neu yn y swyddfa docynnau ar y diwrnod. Mae’r prisiau’n dechrau o ?

Awgrym Arbennig!  Mae gan y teras caffi y tu allan un o’r golygfeydd gorau yn y ddinas. Beth am stopio yno i gael diod neu rywbeth i’w fwyta?

2) Amgueddfa Genedlaethol Caerdydd

Wedi’i lleoli dim ond taith gerdded fer o’r Castell, mae’r adeilad yn rhan o’r Ganolfan Ddinesig, ac mae’n boblogaidd gydag ymwelwyr o bob oed.

Mae’r orielau’n gartref i gasgliad eithriadol o baentiadau gan artistiaid fel Monet, Renoir a Van Gogh. Ochr yn ochr ag amrywiaeth o arddangosfeydd daeareg a hanes naturiol gan gynnwys y deinosor Cymreig, Dracoraptor hanigani! Hefyd, gall ymwelwyr ddysgu mwy am ddiwylliant Cymru yn ei rhaglen reolaidd o ddigwyddiadau.

Awgrym Arbennig!  Gellir mynd i mewn i’r Amgueddfa am ddim, ond mae’n werth edrych ar ei gwefan i weld pa arddangosfeydd sydd ymlaen oherwydd efallai y bydd angen tocyn ar gyfer y rheiny.

3) Bae Caerdydd

Dim ond milltir o ganol y ddinas y mae Bae Caerdydd ac mae’n hawdd ei gyrraedd ar y gwasanaeth bws rhif 6 neu ar drên. Yn boblogaidd am ei olygfeydd ar lan y dŵr, dyma’r lle perffaith i roi cynnig ar un o’r teithiau cwch sydd ar gael yn yr harbwr mewnol – neu gellir aros ar dir sych a mynd am dro o amgylch ymyl y dŵr i’r Morglawdd.

Hefyd, dylech edrych ar y digwyddiadau yng nghanolfan mileniwm eiconig Cymru, yr arddangosfeydd yn adeilad hanesyddol y Pierhead, y gweithgareddau yng nghanolfan wyddoniaeth Techniquest, neu roi cynnig ar fowlio ac ymweld â chasino yng Nghanolfan y Ddraig Goch.

Awgrym Arbennig!  Teithiwch yn ôl i ganol y ddinas ar y tacsi dŵr. Daliwch y tacsi dŵr wrth yr harbwr mewnol a gorffen y daith ym Mharc Bute wrth ymyl Castell Caerdydd. Mae modd prynu tocynnau ar y cwch.

5) Cei’r Fôr-Forwyn, Bae Caerdydd

Ydych chi’n chwilio am le i ymlacio gyda chwrw neu i fwynhau pryd o fwyd braf gyda golygfa o’r dŵr? Cei’r Fôr-Forwyn yw’r ardal ar lan y dŵr sy’n cynnwys amrywiaeth o fariau a bwytai.

Ewch i’r bar annibynnol The Dock, sy’n boblogaidd am ei gynigion bwyd a diod, cerddoriaeth fyw a theras allanol. Oes awydd bwyd arnoch? Mae’r bwyty â thema fotanegol, The Botanist, wedi gwneud enw iddo’i hun gyda’i gebabau sy’n hongian. Mae’n cynnal sesiynau cerddoriaeth fyw ac mae ganddo falconi hefyd. Mae ffefrynnau eraill yn cynnwys Las Iguanas, Cote, Pizza Express a Cosy Club.

Awgrym Arbennig!  Ewch i’r siop Fabulous Welshcakes i brynu bag o bice ar y maen cynnes yn syth oddi ar y gridyll. Gallwch ddewis o amrywiaeth o flasau yn cynnwys rhesins a darnau siocled.