Gŵyl Ffilm LHDTQ+ Gwobr Iris 2026

Gwybodaeth am y Digwyddiad

Am wythnos bob mis Hydref, Caerdydd yw cartref sinema LHDTC+. Yn 2026, bydd y dathliad hwnnw’n fwy nag erioed wrth i Ŵyl Ffilm LHDTC+ Gwobr Iris nodi ei phen-blwydd yn 20 oed.

Rhwng 12 a 18 Hydref, bydd gwneuthurwyr ffilmiau, gweithwyr proffesiynol o’r diwydiant, a chynulleidfaoedd o bob cwr o’r DU a ledled y byd yn ymgynnull yng Nghaerdydd ar gyfer wythnos o ffilmiau rhagorol, sgyrsiau ysbrydoledig, ac eiliadau bythgofiadwy.

Yn fwy na gŵyl ffilm yn unig, mae Iris yn cynnig y cyfle i ddarganfod ffilmiau arobryn cyn pawb arall, cwrdd â’r cyfarwyddwyr a’r perfformwyr y tu ôl i’r straeon, gofyn cwestiynau yn ystod sesiynau holi ac ateb byw, a phrofi’r awyrgylch unigryw sydd wedi gwneud Iris yn un o wyliau ffilm LHDTC+ mwyaf blaenllaw’r byd.

P’un a ydych chi’n dwli ar ffilmiau neu’n chwilio am rywbeth gwahanol i’w wneud yng Nghaerdydd, mae Iris yn cynnig rhaglen lawn o ffilmiau byr rhyngwladol, ffilmiau hir, rhaglenni dogfen, digwyddiadau diwydiant, sgyrsiau, cyfleoedd i rwydweithio, perfformiadau byw, a phartïon gŵyl drwy gydol yr wythnos.

Dros y blynyddoedd, mae Iris wedi croesawu gwesteion gan gynnwys Russell T Davies, y Fonesig Kelly Holmes, Adjoa Andoh, Syr Simon Russell Beale, Alan Hollinghurst, a llawer mwy. Gyda gwneuthurwyr ffilmiau yn teithio i Gaerdydd o bob cwr o Ewrop, Gogledd America, Asia ac Awstralia, pwy a ŵyr pwy y gallech chi ei weld.

Er bod Iris yn hyrwyddo straeon LHDTC+, mae croeso i bawb. Yn wir, mae tua 30% o gynulleidfa’r ŵyl yn ystyried eu hunain yn heterorywiol, sy’n ein helpu ni i rannu straeon LHDTC+ gyda chynulleidfa ehangach fyth.

Ymunwch â ni am wythnos o ffilmiau, sgyrsiau, dathliadau ac eiliadau bythgofiadwy yng nghanol Caerdydd.

PUM FFAITH ALLWEDDOL AM IRIS20

🏳️‍🌈 Mae gŵyl Iris yn dathlu ei phen-blwydd yn 20 oed yn 2026.

🌍 Mae’r ŵyl yn gweithio gyda 22 o wyliau partner rhyngwladol, gan ddod â gwneuthurwyr ffilmiau a straeon o bob cwr o’r byd i Gaerdydd.

🏆 Gwobr Iris o hyd yw un o wobrau ffilmiau byrion LHDTC+ mwyaf y byd, gwerth £40,000.

🎥 Mae enillwyr Gwobr Iris yn y gorffennol wedi mynd ymlaen i gael eu henwebu am Wobr yr Academi, cyfarwyddo cynyrchiadau stiwdio mawr, a dychwelyd i Gymru i greu ffilmiau newydd sy’n cael eu rhannu â chynulleidfaoedd ledled y byd.

🎉 Gallwch ddisgwyl wythnos yn llawn ffilmiau, sesiynau holi ac ateb gyda gwneuthurwyr ffilmiau, digwyddiadau diwydiant, cyfleoedd i rwydweithio, partïon, a’r Gwobrau Iris mawr eu bri.