CLOGYN EICONIG SUPERMAN YN YSGUBO TRWY GAERDYDD AR LWYBR CELF STRYD EPIG

CLOGYN EICONIG SUPERMAN YN YSGUBO TRWY GAERDYDD AR LWYBR CELF STRYD EPIG

CYFLE CENEDLAETHOL I DYNNU LLUNIAU YN UNO CAERDYDD, GLASGOW, BIRMINGHAM, MANCEINION A DULYN CYN RHYDDHAU FFILM ‘SUPERMAN’ DC STUDIOS YN Y SINEMÂU AR 11 GORFFENNAF

• Mae naw murlun sy’n cynnwys clogyn coch eiconig Superman wedi ymddangos ar draws Caerdydd, Glasgow, Birmingham, Manceinion a Dulyn

• Mae’r gosodiadau celf stryd rhyngweithiol yn gadael i ddilynwyr gamu i mewn i esgidiau Superman, yn ogystal â chlogyn sy’n chwythu yn y gwynt

• Dadorchuddiwyd pob un o’r naw murlun heddiw (dydd Mercher 25 Mehefin) i ddathlu ffilm Superman gan James Gunn, sy’n cyrraedd sinemâu ddydd Gwener 11 Gorffennaf

• Cystadleuaeth i ennill gwobrau unigryw trwy god QR ar y murluniau

Caerdydd – Dydd Mercher 25 Mehefin 2025

Heddiw, deffrodd Caerdydd i ddarganfod bod Superman wedi glanio… neu ei glogyn eiconig yn hytrach.

Mae Caerdydd yn ymuno â phedair dinas arall heddiw i ddadorchuddio murlun Superman fel rhan o lwybr epig ledled y wlad.

Wedi’i gynllunio i ddathlu rhyddhau ffilm Superman gan James Gunn, sy’n cyrraedd sinemâu’r Deyrnas Unedig ar 11 Gorffennaf, mae pob un o’r naw murlun yn galluogi dilynwyr i gamu i mewn i esgidiau coch eiconig Superman. Gyda’i glogyn yn chwythu yn y cefn, mae’r gwaith celf rhyngweithiol yn cynnig cyfle unigryw i dynnu llun fel yr archarwr.

Wedi’i alw’n ‘Citycapes’, mae’r gosodiadau yn ceisio creu moment ddiwylliannol ar y cyd ar draws y 5 dinas, gyda phob gwaith celf yn gwahodd dilynwyr Superman i gamu i mewn i esgidiau coch y Dyn Dur, gyda’i glogyn yn chwythu’n arwrol y tu ôl iddyn nhw. Ymddangosodd y gweithiau celf yng Nghaerdydd dros nos ar Stryd Hill ac yng Nghanolfan Red Dragon ym Mae Caerdydd fel rhan o ymgyrch celf stryd ar thema archarwyr ledled y Deyrnas Unedig ac Iwerddon.

Wedi’u cynllunio fel cyfle i’r cyhoedd dynnu lluniau a gosodiad celf stryd mewn un, mae’r murluniau yn adlewyrchu golwg newydd feiddgar y cymeriad Superman yn y ffilm gan James Gunn, gan gyfuno egni llyfrau comig â graddfa’r byd go iawn. Mae rhai o’r murluniau hyd yn oed yn cynnwys ymddangosiad gwadd gan Krypto the Superdog, gan alluogi dilynwyr o bob oedran i ryngweithio â chyfaill mwyaf ffyddlon Superman.

Yn ogystal, mae gan bob murlun god QR unigryw i’w sganio, gan roi cyfle i ymwelwyr ennill cyfle preifat unigryw i weld y ffilm Superman hirddisgwyliedig yn y lleoliadau mae’r gweithiau celf wedi ymddangos.

Dywedodd yr Aelod Cabinet dros Ddiwylliant, Parciau a Digwyddiadau, y Cynghorydd Jennifer Burke: “Rydyn ni’n falch o gael ein dewis fel un o ddim ond pum dinas yn y Deyrnas Unedig i gynnal y profiad diwylliannol hwn i ddilynwyr. Bydd y gwaith celf rhyngweithiol yn rhoi cyfle i ddilynwyr Superman hen a newydd ddal eiliad ‘arallfydol’ gyda ffrindiau a theulu wrth ymweld â’r ddinas.”

Bydd Superman yn cael ei rhyddhau yn y Deyrnas Unedig ar 11 Gorffennaf 2025 gan Warner Bros. Pictures.

FFEITHIAU A FFIGURAU AM Y SBLOET

• STRYD HILL – Y tu allan i Ganolfan Dewi Sant, Stryd y Bont,

Canolfan Dewi Sant, Caerdydd CF10 2EF

• Artistiaid: TOM SLEDMORE, HASSAN KAMIL
• Union leoliad What.3.Words – ///dips.funny.bottom

• CANOLFAN RED DRAGON – Heol Hemingway, Caerdydd CF10 4JY
  • Artistiaid: RYAN STUART, KYLE HILL
  • Union leoliad What.3.Words – ///goad.spits.civic