Cyhoeddi Tîm Seiclo Prydain Fawr Ar Gyfer Ras Dynion Taith Prydain Lloyds

Dydd Mercher, 27 Awst 2025

Mae’r chwe beiciwr a fydd yn cynrychioli Tîm Beicio Prydain Fawr (GBCT) yn Nhaith Prydain Lloyds ym mis Medi wedi cael eu cyhoeddi heddiw.

Bydd dau feiciwr yn gwneud eu hymddangosiad cyntaf yn ras feicio broffesiynol fwyaf Prydain – Ben Chilton a Huw Buck-Jones – ochr yn ochr â’r pâr o ras 2024, Ben Wiggins a Josh Golliker, gyda Josh Charlton a Matt Bostock yn cwblhau’r lein-yp ar gyfer y ras.

Y gwibiwr Matt Bostock yw’r mwyaf profiadol o’r chwech, ar ôl reidio Ras Dynion Taith Prydain Lloyds ar bedwar achlysur ers 2018, gan ennill lle yn y deg uchaf ddwywaith mewn gwibiau clwstwr.

Enillodd cyn-bencampwr treial amser dan 23 Prydain, Josh Charlton, gymal o’r Rás Tailteann yn lliwiau Prydain Fawr yn gynharach y tymor hwn, ac yn ymuno ag ef yn GBCT mae’r beiciwr a ddaeth yn drydydd ym mhencampwriaethau treialon amser cenedlaethol Lloyds 2023, Joshua Golliker.

Mae Golliker, a wnaeth ei ymddangosiad cyntaf yn Ras Dynion Taith Prydain Lloyds 12 mis yn ôl, wedi bod yn rasio i dîm datblygu EF Education – Aevolo yn 2025, gan gipio trydydd safle trawiadol yn ras dan 23 Gent – Wevelgem ym mis Mai.

Yr ail i ddychwelyd o 2024 yw Ben Wiggins, a fydd yn rasio dros GBCT am yr ail fis Medi o’r bron. Mae’r llanc 20 oed, sy’n gyn-bencampwr byd ac Ewropeaidd iau ar y trac, yn ei ail dymor o rasio gyda thîm datblygu’r enwog Hagens Berman Jayco.

Yn gwneud ei ymddangosiad cyntaf yn Ras Dynion Taith Prydain Lloyds fydd Ben Chilton o Derby, a ddaeth yn ail ym Mhencampwriaethau Cenedlaethol Cyclo-cross Lloyds yn gynharach eleni. Yn gyn-enillydd rownd Grand Prix Guildford cyfres cylchdaith genedlaethol Lloyds, mae Chilton wedi bod yn rasio yn Ffrainc y tymor hwn, gan gipio sawl buddugoliaeth yn eu calendr domestig.

Mae’r garfan o chwe beiciwr yn cael ei chwblhau gan ail wyneb newydd, Huw Buck-Jones, sydd hefyd yn rasio yn Ffrainc i’r clwb Bourg-en-Bresse y tymor hwn. Yn wreiddiol o Ogledd Cymru, mae Buck-Jones wedi dod o gefndir beicio mynydd, ar ôl cystadlu yn y digwyddiad traws gwlad dan 23 ym Mhencampwriaethau’r Byd 2023 yn Glasgow.

Dywedodd Matt Brammeier, Cyfarwyddwr Chwaraeon gyfer Tîm Beicio Prydain Fawr: “Bob tro mae beiciwr yn gwisgo crys Prydain Fawr, maen nhw’n cael y cyfle i ysbrydoli, sy’n anhygoel. Gyda Thaith Prydain Lloyds eleni, rydw i wedi dod â chymysgedd o feicwyr profiadol a’r rhai sy’n camu i fyny at ei gilydd, gan roi’r llwyfan iddyn nhw ddangos beth maen nhw’n gallu ei wneud i gymryd y camau nesaf yn eu gyrfaoedd. Rwy’n edrych ’mlaen i weld beth allwn ni ei wneud.”

Mae Ras Dynion Taith Prydain Lloyds yn dechrau ddydd Mawrth 2 Medi gyda phâr o gymalau yn Suffolk, gyda’r gyntaf yn mynd o Woodbridge i Southwold, cyn cymal sy’n dechrau a gorffen yn Stowmarket. Mae’r cymal canlynol yn ymweld â Milton Keynes ac Ampthill yng Nghanolbarth Swydd Bedford am y tro cyntaf, cyn cymal heriol yn Swydd Warwig sy’n gorffen ar ben bryn ym Mharc Gwledig Bryniau Burton Dassett.

Mae’r ras yn dod i ben gyda chyfres o gymalau heriol yn ne Cymru, gyda’r gyntaf yn cynnwys dringfa ddwbl ar y Tymbl, cyn y cymal olaf rhwng Felodrom Cenedlaethol Geraint Thomas yng Nghasnewydd a phrifddinas Cymru, Caerdydd, ddydd Sul 7 Medi.